ШҮҮГЧИЙН ТУСЛАХ Б.АРМАНБЕК ХУУЛЬЧИЙН ТАНГАРАГ ӨРГӨЛӨӨ

  • 2025-02-19

Монголын Хуульчдын холбооны 2024 оны Хуульчийн мэргэжлийн шалгаруулалтад 1200 гаруй эрх зүйч бүртгүүлж, 205 эрх зүйч шалгалтад тэнцсэн байна. Уг сонгон шалгаруулалтад Баян-Өлгий аймаг дахь шүүхийн Тамгын газрын Хэргийн хөдөлгөөний удирдлагын хэлтсийн шүүгчийн туслах Б.Арманбек амжилттай оролцон тэнцэж, Хуульчдын холбоонд гишүүнээр элссэн юм.

https://dc628.4shared.com/img/x-WUZsmpge/s24/1951d8bd068/1_online?async&rand=0.5410953497566979

Хуульчийн эрх зүйн байдлын тухай хуулийн 23 дугаар зүйлийн 23.1 дэх хэсэгт “Хуульч хуульчийн мэргэжлийн үйл ажиллагаа эрхлэх зөвшөөрөл авснаас хойш 30 хоногийн дотор Хуульчдын холбоонд тангараг өргөнө” гэж заасныг үндэслэн хуульч Б.Арманбект тангараг өргүүлэх ёслолын ажиллагааг Монголын Хуульчдын холбооны Баян-Өлгий аймаг дахь салбараас 2025 оны 02 дугаар сарын 19-ний өдөр тус шүүхийн шүүх хуралдааны танхимд зохион байгууллаа.

Тус үйл ажиллагаанд тус шүүхийн Ерөнхий шүүгч, шүүгчид, шүүхийн захиргааны болон үйлчилгээний ажилтнууд оролцож, тангараг өргөж буй хуульчдад баяр хүргэн, Монголын Хуульчдын холбооноос ирүүлсэн энгэрийн тэмдэг, хуульчийн мэргэжлийн үйл ажиллагаа эрхлэх зөвшөөрлийн гэрчилгээ болон хамт олны дурсгалын зүйл гардуулан өгч, хүндэтгэл үзүүллээ.

Хуульчийн тангараг өргөсөн шүүгчийн туслах Б.Арманбект дахин баяр хүргэж, ажлын өндөр амжилт хүсье.

БАЯН-ӨЛГИЙ АЙМАГ ДАХЬ ШҮҮХИЙН ТАМГЫН ГАЗАР

2025.02.19